Inhlanganiso ye Joint Monitoring and Implementation Committee, i JOMIC yethule umbiko isola udlakela elizweni, lendlela intathelizindaba ezethula ngayo indaba zodlakela.
IJOMIC ithi abamaphephandaba labemisakazo basebenzisa ulimi olungaqondanga oluxega uzulu njalo athatha uhlangothi, okuyikwephula isivumelwano sokubunjwa kukahulumende womanyano ese Global Political Agreement.
UMnu. Qhubani Moyo, omunye wabagcinisihlalo bekomidi ebona ngokwethulwa kwezindaba kuli nhlanganiso okwalinyanga, utshele uSithandekile Mhlanga we Studio 7 ukuthi iJOMIC izahlangana labahleli elizweni babonisane ngokuthi indaba eziphathelane lomumo oselizweni zingethulwa njani ngendlela eqondileyo engatshotshozeli udlakela lengxabano.
Kusenjalo, amapholisa abikwa ebophe amalunga ecele le MDC elikhokhelwa nguMnu. Morgan Tsvangirai ko Bulawayo, njalo ebe lokhu edobha-dobha abanye eNkulumane ngolweSithathu ntambama ngokuphathelene lodlakela.
EMasvingo, uMfundisi Ray Motsi ongumgcinisihlalo wenhlanganiso yabezinkonzo eyeChristian Alliance ubikwa ubotshiwe okwesikhatshana ngolweSithathu. UMotsi uphange wakhululwa kodwa ukhangelelwe emthethwandaba ngolweSine. UMotsi ubikwa ebotshelwe ukuqhuba umhlangano wabezinkonzo owe Grace to Heal engazisanga amapholisa .
Lokhu kwenzakala esinye isiphathamandla se cele le MDC elikhokhelwa nguMnu. Tsvangirai, Umnu. Douglas Mwonzora lamanye amalunga alitshumi lambili belokhu bevalelwe e-Nyanga.
Igqwetha lababotshwe ko Bulawayo, uMnu. Lizwe Jamela, utshele uSithandekile Mhlanga ukuthi abathathu laba, nguSikhangele Sibanda, uSibonisiwe Nyoni, lo Sanani Sibanda bavalelwe esitokisini se Bulawayo Central besetheswa icala lokufuna ukubangela udlakela.