Sokuqhamuke ukuphikisana phakathi kwezakhamizi koBulawayo lekhansili yakuleli dolobho ngodaba lokuthi ikhansili le yamukela isipho samabhimu esivela kunhlanganiso elwela amalungelo ezitabane, eye Sexual Rights Centre.
Izakhamizi zithi bekungafanelanga ikhansili iwamukele amabhimu la ngoba amasiko awavumeli amalungelo ezitabane, kukanti udaba lokuthi amalungelo ezitabane emukelwe lokhu lusahlafunwa elizweni.
Amabhimu la alombala othe kla oyi pink, njalo alebizo lenhlanganiso le okwenza akhanye ehlukene kakhulu lavele esetshenziswa yikhansili alombala olithanga.
UMayor walelidolobho uMnu. Patrick Thaba Moyo utshele uSithandekile Mhlanga weStudio 7 ukuthi ikhansili yakhe yemukela amabhimu la ngoba izitabane lazo ngabantu njalo balelungelo lokupha ikhansili isipho.
Kusenjalo uMnu. Samuel Moyo, unobhala jikelele wenhlanganiso ye Bulawayo Residents Association utshele iStudio 7 ukuthi ngabe ikhansili iqale yakhuluma lezakhamizi kuqala ingakemukeli lesisipho.
UMnu. Mojalisa Mokoele, isikhulumi seSexual Rights Centre uthi amabhimu abo ayi pink ngoba yiwo umbala osetshenziswa yinhlanganiso le njalo abalandaba lokuthi abantu abawafuni nxa ikhansili isiwavumile.