Usikomitshi wamapholisa, uMnu. Augustine Chihuri uthi udlakela oluselizweni lubangelwa ikakhulu ngamalunga ecele le MDC elikhokhelwa nguMnu. Morgan Tsvangirai, okwedlula awe bandla le ZANU PF.
UChihuri ubebizwe edale lephalamende ngolweSine ukuthi achasise ngokuthi amapholisa aluphatha njani udaba lodlakela phambi kwekomidi ebona ngokwenzakala elizweni kanye lebona ngokulondolozwa kokuthula edale le Senate.
Usole amakomiti la ngokumbiza ukuzochasisa, esithi amapholisa awabandlululi abantu nxa eqhuba umsebenzi, njalo ayisiwo abangela udlakela, ngoba udlakela lubangelwa yiziphathamandla zecele le MDC elikhokhelwa nguMnu. Morgan Tsvangirai ezigoqela uNkosazana Thokozani Khuphe, uMnu. Tongai Mathuthu, uNkosazana Theresa Makone, uMnu. Paul Madzore, labanye.
Ukuze sihlaziye loludaba, uSithandekile Mhlanga we Studio 7 uxoxe loMnu. Alois Dzvairo, ingcwethi ecubungula ezombusazwe, endawonye loNkosazana Gladys Dube-Gombami ilunga lekomidi yedale lephalamende ebona ngokuthula edale lesenate.
UNkosikazi Dube-Gombami usungule lingxoxo ngokuthi ikomidi yakhe ibize uMnu. Chihuri isinanzelele ukuthi akubotshwa abantu ababangela udlakela .