Inhlanganiso ye Central Statistical Office, CSO, imanyene lebona ngamalungelo abantwana, eye United Nations Children's Fund, UNICEF, yethula umbiko okhomba ukuthi abantwana abalikhulu abangaphansi kweminyaka emihlanu yokuzalwa bayafa nsukuzonke kweleZimbabwe, njalo abane phakathi kwabalitshumi zintandane, kubangelwa yimikhuhlane, egoqela owengculaza, kanye leminye, eyelaphekayo enjenge ngculaza, isihudo loqhuqho.
Esethula lumbiko, eHarare ngolweSibili, uMnumzana Tinashe Mwadiwa, isiphathamandla se CSO uthe abesifazane abatholi uncedo ezibhedlela olokuvikela limikhuhlane, njalo uDokotela Peter Salama we UNICEF wathi okumangalisayo yikuthi kwamanye amazwe, impilo yabantwana iba ngcono, kodwa kweleZimbabwe umumo lokhu usiba mubi ngamandla.
Kunjalo nje, UMnu. Sipho Mahlangu, isiphathamandla senhlanganiso elwela abaphila legcikwane lengculaza, iZimbabwe National Network of People Living with HIV (ZNNP+) utshele uSithandekile Mhlanga owe Studio 7 ukuthi sebezasungula ugatsha lwabantawana abaphila legcikwane kulinhlanganiso ngoba beswela amaphilisi okulwisana lomkhuhlane.