Kodwa inani leli libikwa lingasoze liyendawo nxa kungalungisiswanga umumo wezombusazwe
Abalamabhizimisi aphathelane lezokwethekelelwa kwelizwe babikwa besithi sekulobubelo emsebenzini yabo. Uhlangothi lweZimbabwe Tourism Board luthi kunyanga ezimbili ezedluleyo inani lezethekeleli ezivela emazweni aphetsheya likhuphuke ngesilinganiso samatshumi amahlanu ekhulwini-50%.
Ngenyanga kaNhlangula kulemidlalo yenguqu yeWorld Cup kwele South Africa akuzange kube lezethekeleli ezinengi lanxa kwakukhangelelwe ukuthi kuxokozele elizweni. Kodwa ingcwethi ecubungula ezombusazwe, uMnu. Rejoice Ngwenya utshele uChris Gande weStudio 7 ukuthi inani lezethekeleli alisoze laqonga okuyangaphi nxa ezombusazwe zingalungisiswanga.