Izakhamizi zemaphandleni zithi lanxa ukudla sokutholakala lula ezitolo, intengo yakho ilokhu iqansa, okubangela ukuthi bengenelisi ukukuthenga, kukanti lokusetshenziswa kwamarandi kubangela ukuthi bengenelisi ukuthenga okunengi nxa isintshintshwa phansi kwe “Cross rating”.
IStudio 7 ixoxe labameli bezigaba zemaphandleni ezitshiyeneyo ephalamende ababhoda-bhode ezigabeni zabo ngeSonto langoMgqibelo, bedingisisa ukuthi abantu bathakazelele njani ikhefu leKhisimusi.
UMnu. Edward Mkhosi omela iMangwe edale lephalamende utshele uSithandekile Mhlanga we Studio 7 ukuthi abantu abahlala esigabeni sakhe bathembe izihlobo zabo ezisebenzela kwele South Africa kodwa uncedo lwabo soluphanjaniswa yindlela okusetshenziswa ngayo amarandi.
UNkosazana Nomalanga Khumalo, omela uMzingwane edale lephalamende utshele uSithandekile Mhlanga we Studio 7 ukuthi lanxa ukudla kutholakala ezitolo, inengi labantu kalisebenzi, ngakho alenelisi ukukuthenga lokhukudla, njalo abasebenzayo sebegcine imali yabo ukuthi beyisebenzise ukubhadalela abantwababo ama school fees izikolo zivulwa ngenyanga ezayo.