Inhlanganiso elwela ilungelo loluntu eye Tolerance and Reconciliation Development ithi iqoqa uluhlu lwabantu elanyamalalayo ngesikhathi sokhetho lokudinga umongameli ngomnyaka ka 2008, njalo selifumene ukuthi kulabantu abedlula amakhulu amahlanu-500, abanyamalala esigabeni seMasvingo ngalesisikhathi.
UMnu. Gamuchirai Mukura, isiphathamandla salinhlanganiso, utshele iStudio 7 ukuthi abanyamalalayo laba kucatshangelwa ukuthi bathunjwa ngabasekeli bebandla le ZANU PF bencediswa ngabezomvikela.
Ungezelele wathi kungenzeka ukuthi abanye baphoselwa emadamu, lapho okuhlala khona inyamazana, kumbe bachaphela eSouth Africa ukuyadinga ubuphepheli.
UGamuchiria uthi inhlanganiso yakhe izahambisa ekufumeneyo ekupheleni kwaloluhlelo kugatsha lukahulumende olubona ngokwenzakala elizweni ukwenzela ukuthi kudingisiswe ngabantu laba abangabonakaliyo.
Ukuhlaziya loludaba uSithandekile Mhlanga we Studio 7 uxoxe loMnu Effie Dlela-Ncube ingcwethi ecubungula ezombusazwe yena othi kungenzakala ukuthi ukudingisisa okwenziwe yilinhlanganiso kube liqiniso ngoba ibandla leZANU PF selake lenza okufanayo esigabeni seMatabeleland ilizwe lisanda ukuthola uzibuse.