Bekhuluma lentathelizindaba eHarare ngoMvulo uMongameli Robert Mugabe,Inhloko kahulumende uMnumzana Morgan Tsvangirai kanye lomsekeli wakhe uMnumzana Arthur Mutambara bathi abakavumelani ukuthi ukhetho luzakwenziwa nini.
Lokhu sokutshiye inengi limangele ngoba ngoMgqibelo odluleyo, egqiba umhlangano webandla le ZANU PF uMugabe uthe uhulumende womanyano sokumele afike emaphethelweni kwenziwe ukhetho.
Inkokheli kahulumende womanyano ibike njalo ukuthi ukhetho luzakwenziwa kuphela nxa elizweni kungaba lesisekelo esitsha kulandelwa iziqondiso ze Global Political Agreement.
UBrenda Moyo weStudio 7 ukhulume lengcwethi ecubungula ezombusazwe uMnumzana Zenzo Nkomo othi kungaba kuhle ukuthi inkokheli kahulumende womanyano ilandele konke lokhu ekutshoyo.