Inhlanganiso emela abathengi eye Consumer Council of Zimbabwe ibika ukuthi intengo yezinto iqonge ngesilinganiso esedlula okungamatshumi amabili ekhulwini-20.5% kuyonale inyanga ukwedlula lokho ebiyikho khona ngenyanga edluleyo.
I CCZ ipha isibonelo sentengo yamafutha okuphekisa i 2 litres eqonge isuka kumadollar eMelika phose amathathu-US $2.90 yafika edlula kancane amathathu- US$3.10. Umgodla olesisindo samakilogram alitshumi-10 kg yempuphu iqonge isuka kumadollar phose amahlanu-US$4.80 yayafika phose kwayisithupha-US$5.80.
Ingcwethi kwezenotho zithi ukuqonga kwentengo yezinto lokhu akuqondanga ngoba abamabhizimisi bengela sizatho esiqinileyo sokukhweza intengo.
Kodwa abaninibhizimisi bona bathi intengo iqongiswa yikuthi bathenga impahla zabo kwamanye amazwe, ikakhulu kweleSouth Africa.
Umqondisi wenhlanganiso yabaninibhizimisi abensundu i Affirmitive Action Group uMnumzana Sam Ncube uthi okunye okukhathazayo ludaba lokuthi elizweni kusetshenziswa imali zakwamanye amazwe ezinengi ezitshiyeneyo.
