Abasakhulayo bebandla leZanu PF balwisane kanzima lamapholisa ngoLwesithathu ebaxotsha kwesinye isakhiwo esikasomabhizimusi wakwele India abazihlalise khona ngenkani. Abasakhulayo beZanu PF laba babikwa belokhu beqhubekela phamabili ngomkhankaso wabo wokungena ngenkani kuzakhiwo zabosomabhizimusi bakwamanye amazwe. Lanxa ezinye zezakhiwo lezi ezifana leZambezia le Canberra zisetshenziswa kodwa zingenelwa ngabasakhulayo beZanu PF laba besithi osomabhizmusi bakwele India babhadalisa imithelo yerent ephezulu kakhulu.
Lanxa amapholisa enelise ukuxotsha abasakhulayo laba ngemva kokulwisana okukhulu ngoLwesibili babikwa bebuyele ngoLwesithathu. Amapholisa lenkokheli yeZanu PF yalile ukukhuluma leStudio 7.
Kodwa umkhokheli wenhlanganiso elwela ilungelo labosomabhizimusi abansundu koBulawayo, i AAG, uMnu Sam Ncube uthi lanxa bekhathazeka ngokungasetshenziswa kwezakhiwo basola kakhulu ubudlwangudlwangu bokuthatha izakhiwo lezi.