Ikhomithi yedale lephalamende ebona ngezempilakahle ithi ukudingisisa ekwenzileyo kuveza ukuthi uhulumende uthengiselwa amaphilisi asetshenziswa elizweni kumankampani angaphandle kwelizwe ngentengo ephezulu.
Inkampani kahulumende okufanele iqhube lumsebenzi eye NATPHARM, ibikwa ingasela mali eneleyo yokuqhuba lumsebenzi.
Ikhomithi le ithi kufanele uhulumende anike i NATPHARM imali yokudinga amaphilisi asetshenziswa elizweni, wona abiza izigidi ezedlula amatshumi ayisithupha ngomnyaka, $65 million.
Amankampani lenhlanganiso ezincedisa ilizwe ngamaphilis zigoqela iDepartment of International Development of Britain, iCanadian International Developmnet AID, kanye le ngatsha zenhlanganiso yomanyano wamazwe womhlaba ezehlukeneyo eye United Nations.
Ukuze sihlaziye loludaba, uSithandekile Mhlanga oweStudio 7 uxoxe loMnu. Sipho Mahlangu, isiphathamandla senhlanganiso elwela amalungelo abantu abaphila legcikwane lomkhuhlane we ngculaza eye Zimbabwe National Network for People Living with HIV/AIDS, ochasisa kabanzi indlela abathola ngayo amaphilisi la.