Iqembu elimela iZimbabwe emdlalweni weCricket liyangise iqembu le India okwesibili ngoLwesine emdlalweni wamaOne Day International Triangular Series odlalelwe eHarare Sports Club.
Izimbabwe inqobe i India nge 7 wickets. Emdlalweni wakuqala ngeviki edluleyo iZimbabwe yanqoba nge 6 wickets. NgoLwesine i India yiyo eqale ukubhetha yahlohla ama runs angu 194/9.
Kuthe sokulithuba leZimbabwe lokubhetha, wangena uBrendan Taylor loHamilton Masakadza bengasadlanga nkotshana. UTaylor uhlohle amaruns angu 74 engakakhitshwa kwathi umasakadza wahlohla 66 runs.
U Charles Coventry laye ungenile wahlohla 20 runs bengakamkhiphi. Abacine ukubhethela iZimbabwe nguTatenda Taibu lo Elton Chigumbura. UTaibu uhlohle 13 runs kwathi uChigumbura wahlohla 16 iZimbabwe yacina iku 197/3 okutsho ukuthi inqobe i India nge 7 wickets.
Imidlalo le iyaqhubeka ngoMgqibelo lapho i India ezangqikilana khona le Sri Lanka yona enqobe iZimbabwe nge 9 wickets ngoLwesibili. Sixoxe lomlandeli weCricket uGodfrey Koti othi ujabule kakhulu ngokunqoba kweqembu leZimbabwe.