Isigodlo someli weGermany eZimbabwe sesibhalele ugatsha olubona ngezaphandle kwelizwe lukhonona ngokwephulwa kwesivumelwano seBilateral Investment Properties Agreement iBIPPA nguhulumende weZimbabwe.
Lokhu kulandela udaba lokuthi kuleziphathamandla zikahulumende weZimbabwe ezifuna ukuthatha indawo ezigcinelwe inyamazana zendle ezigoqela i Valley Conservancy Trust eyesinye isizalwane sakwele Germany.
Isigodlo someli weGermany eZimbabwe sithi siloluhlu lwamabizo eziphamandla zebandla leZANU PF ezizibiza zisithi Masvingo Initiative ezifuna ukuthatha lezindawo.
Lokhu kulandela udaba lokuthunjwa kwendawo zezethekeli esigabeni seManicaland, le Lake Chivero duzane leHarare ngeviki edluleyo.
Umphathintambo wezokwethekelelwa kwelizwe uMnumzana Walter Mzembi, ekhuluma leStudio 7 namhla usole kakhulu ukuphazanyiswa kwemisebenzi yezokwethekelelwa kwelizwe, ngabantu athi yizigelekeqe.
UMzembi uthi wemukele njalo imibiko yokuthathwa kwendawo ezigcinelwa inyamazana zendle esola labo abafuna ukwenza lokhu.
Ingcwethi ecubungula ezombusazwe uMnumzana Walter Nsununguli Mbongolwane uthi ukuthunjwa kwendawo zamabhizimisi yilabo abacatshangelwa ukuthi ngabalwa impi yenkululeko kuveza ukungasuthiseki kwabo ngoba basetshenziswa libandla leZANU PF ukuthathathela abamhlophe umhlaba kodwa bona abawutholanga.