Abacatshangelwa ukuthi ngabasekeli bebandla leZANU PF babikwa sebexotshe izakhamizi emizini yazo esigabeni seMatebebeland South. Lokhu kubikwa kwenzakala kakhulu edolobheni le West Nicholson. UChris Gande we Studio 7 uxoxe lomunye usomabhizimusi we Nicholson, uMnu. Sihle Ngwenya othi umumo usumubi kakhulu kulindawo.
Inhlanganiso ezilwela ilungelo loluntu lamuhla zisole uku hlukuluzwa kwamalunga enhlanganiso ye International Socialist Organization abotshwe ngeviki edluleyo esetheswa icala lokuzama ukugenqula uhulumende njengalokhu okwenzakala kwele Egypt le Tunisia.
Ababotshiweyo, bamelele ukumiswa phambi komthethwandaba ngoMvulo ozayo, njalo umkhokheli wabo uMnu. Munyaradzi Gwisai utshele umthethwandaba ngolweSine ukuthi yena labanye bakhe batshaywe kakubi ngamapholisa esitokisini ebabamba ngamandla ukuthi bevume icala abaletheswayo.
Umantshi unqume ukuthi ababotshiweyo laba belatshwe bengakaphindeli emthethwandaba ngoMvulo ozayo. Inhlanganiso yababeyinkokheli yezifundi zemakolitshini, iFormer Zimbabwe Students Leaders Network lelwela amalungelo abatsha eye Youth Forum ziyasola lazo ukubotshwa kwalaba bantu.
Eye Restoration of Human Rights yona ithi uhulumende wephula imithetho yomanyano wamazwe ase Africa lemhlabeni jikelele, esola ukuhlukuluzwa kwabantu.
Kusenjalo, uMnu. Discent Bajila, isiphathamandla sabatsha kucele le MDC elikhokhelwa nguMnu. Welshman Ncube utshele uSithandekile Mhlanga we Studio 7 ukuthi bekungafanelanga ukuthi amalunga e International Socialist Organization abotshwe.