Ukukhalala umsebenzi okuqoqwe ngumanyano wenhlanganiso ezilwela ilungelo lezisebenzi zikahulumende eye APEX Council kuqalisile ngoMvulo, njalo inengi lababalisi likhalele umsebenzi, kwathi abasebenza emahofisini kahulumende baziqhubekela ngemisebenzi yabo.
Izisebenzi zikahulumende, ebezikhalele umsebenzi okwelanga elilodwa ngeviki edluleyo, zithi zifuna ukwengezelelwa iholo lisuka phedluzwana kwamakhulu amabili amadollar-$253 lisiya kumakhulu edlula amahlanu amadollar-$538 ngenyanga kusukela kusisebenzi esithola iholo eliphansi.
UMnu. Sifiso Ndlovu, isiphathamandla se APEX Council utshele iStudio 7 ukuthi ngolweSibili izisebenzi zizaqhubeka ngokukhalala umsebenzi lanxa zilokhu zisadinga indlela yokukhulumisana lohulumnede.
Kusenjalo, icele le MDC elikhokhelwa nguMnu. Morgan Tsvangirai selethule umbiko ligcizelela ukuthi uhulumende ngabe usebenzisa imali etholwa ekuthengiseni amadayimana ukwengezelela iholo lezisebenzi.
Umsekeli kamqoqi walelibandla uMnu. Abednico Bhebhe utshele uSithandekile Mhlanga ukuthi ibandla lakhe lisola eleZANU PF ngomumo obhekane lezisebenzi.