Izisebenzi zikahulumende eziphakathi kokukhalala umsebenzi zithi ziphakathi kokulungisa ugwalo lwe petition oluzahanjiswa kunkokheli zikahulumende womanyano ngoba zingathembi ukuthi izikhalazo zazo ziyake zibafinyelele.
Ugwalo lwezikhalazo lolu lukhangelelwe ukuqhutshelwa u Mongameli Robert Mugabe, inhloko kahulumende uMnu. Morgan Tsvangirai, kanye lomlawuli wedale lephalamende uMnu. Lovemore Moyo.
UMnu. Enock Paradzai, isiphathamandla se Progressive Teachers’ Union of Zimbabwe, enye yenhlanganiso eziphakathi kwalokhu kukhalala umsebenzi, utshele uSithandekile Mhlanga we Studio 7 ukuthi kuyadanisa ukubona abanye ababalisi befundisa befuna ukubhadalwa ngabazali, ngoba bezathola imali yesikhatshana engasoze ibancede kwelakusasa.
Kusenjalo, uMnu. Mfundo Mlilo, isiphathamandla se ZINASU, uthi inhlanganiso yakhe ithumele ugwalo lwezikhalazo kuhulumende womanyano ukuthi ahlolisise njalo alungisise udaba lokusilela kwababalisi emakolitshini aphezulu.