Amalunga edale lephalamende abikwa ekhalaza esithi afuna engezelelwe iholo lisuka kumakhulu amane amadollar eMelika-US$400 lisiya kunkulungwane ezintathu-US$3,000 ngenyanga, njalo aphiwe inkulungwane ezingamakhulu amabili zamadollar-US$200 000 yokusebenzisa munye ngamunye ezigabeni zabo, ngoba elendleko ezinengi.
Amalunga la akhalaza njalo ukuthi aphiwe enye imali, kungaba lokhetho ngomnyaka ozayo, ngoba engasaqedisanga iminyaka emihlanu kulelidale njengokwakukhangelelwe.
NgolweSithathu amalunga alelidale abikwa ebethe azavimba ukuthi uluhlu lokusetshenziswa kwemali elizweni, olwe Budget, luvunyelwe ukuqhutshelwa phambili kulelidale, nxa izikhalazo zabo zingafezwanga, kodwa awasakwenzanga lokhu.
Ukuze sicubungule ukuthi izikhalazo lezi zifanele, uSithandekile Mhlanga weStudio 7 uxoxe loMnu. Rejoice Ngwenya, ingcwethi ecubungula ezonotho, endawonye loSenator Gladys Gombami-Dube.