Umthethwandaba ka mantshi ko Bulawayo unqume ukuthi icala eletheswa iziphathamandla ze Matabeleland Liberation Front ezintathu elokuzama ukugenqula uhulumende lizathoniswa mhlaka 25 kuyonale inyanga, njalo alusoze lulahlelwe khatshana njengalokhu obekulwelwa ngamagqethwa.
Kubikwa kube lokuxokozela amapholisa echitha-chitha abantu abakade beze ngobunengi babo ukuzolalela udaba lwababotshiweyo laba, ababalisa uMnu. Paul Siwela, uMnu. John Gazi kanye loMnu. Charles Gumbo, njalo kwabotshwa iziphathamandla zalinhlanganiso ezinhlanu emthethwandaba.
Isikhulumi seMthwakazi Liberation Front, uMnu. David Magagula utshele uSithandekile Mhlanga we Studio 7 ukuthi kusobala uhulumende wesaba ukuthi inhloso yokuthi isizwe sikaMthwakazi sizibuse ingaphumelela.
Kusenjalo, umthethwandaba waphezulu eHarare ukhulule ngesibambiso se bail isiphathamandla secele le MDC elikhokhelwa nguMnu. Morgan Tsvangirai, uMnu. Douglas Mwonzora lamalunga edlula amatshumi amathathu abotshwa ngenyanga edluleyo eMutare.
Udaba lomkhokheli wenhlanganiso yeInternational Socialist Organization, uMnu. Munyaradzi Gwisai labahlanu abotshwa besetheswa icala lokuzama ukugenqula uhulumende njengalokhu okwenzakala egibhithe, ludluliselwe phambili kuviki ezayo.