Kulandela ukuvumelana kwabo ngoMvulo, abakhokheli bamabandla abumba uhulumende womanyano bethule uluhlu lwamagama abantu abenelise ukungena kumakomishini amathathu abunjwe phansi kwesivumelwano se Global Political Agreement.
Amakomishoni la abalisa i Zimbabwe Electoral Commission, i Zimbabwe Human Rights Commission le Zimbabwe Media Commission.
UMongameli Mugabe, uMnumzana Morgan Tsvangirai loMnumzana Arthur Mutambara bavumelene phezu kwamalunga amakomishini la njalo bakhangelelwe ukuhlangana ngolweSithathu bekhulumisana ngokunye okulokhu kuhlupha kuhulumende womanyano.
Amabizo abosikomitshi laba ami kanje; ku Zimbabwe Electoral Commission kulo Joyce Kazembe, Petty Makoni, Sibongile Ndlovu, Bessie Nhandara, Daniel Chigaru, Theophilus Gambe, Geoff Feltoe loMkhululi Nyathi. Umgcinisihlalo walikomishini kakakhethwa.
Sikhangele i Zimbabwe Human Rights Commission; kulo Ellen Sithole, Kwanele Jirira, Neseni Nomathemba, Elasto Mugwadi, Joseph Kurembgwa, Japhet Ndabeni-Ncube, Jacob Mudenda lo Carol Khombe. Umgcinisihlalo wekomishini le laye kakakhethwa.
I Zimbabwe Media Commission yona imi kanje; kulo Godfrey Majonga, onguye umgcinisihlalo esekelwa nguNqobile Nyathi, kuzoba loMiriam Madziwa, Lawton Hikwa, Henry Muradzikwa, Chris Mutsvangwa, Mathew Takaona, Chris Mhike lo Millicent Mombeshora.
Ilunga le Zimbabwe Human Rights Commission uMnu Japhet Ndabeni-Ncube, yena owake waba ngumeya wedolobho lakoBulawayo utshele iStudio 7 ukuthi uzasebenza nzima emizameni yokuthuthukisa amalungelo kazulu.
Amabandla ezombusazwe akuhulumende wona aveze ukujabula okukhulu esithi ukukhethwa kwamakomishini la kuveza ukuthi ngempela azimisele ukulungisisa konke okuhluphayo phakathi kwawo.
Umsekeli wesikhulumeli seMDC ekhokhelwa nguMnu Arthur Mutambara, uMnu Renson Gasela utshele lumsakazo ukuthi ibandla lakhe lilokujabula okukhulu ngokukhetwha kwabosikomitshi laba.
Imizamo yokukhulumisana labebandla leZanu PF yehlule. Kodwa imbiko esiyamukeleyo iveza ukuthi iziphathamandla zaleli bandla ezinengi kazijabuli lakancane ngamalunga amakomishini la ngoba zisithi amanengi awo akhanya engabantu abasekela iMDC.
Umsekeli wesikhulumeli seMDC ekhokhelwa nguMnu Tsvangirai uNkosazana Thabitha Khumalo utshele uNtungamili Nkomo weStudio 7 ukuthi labo bajabule kakhulu kodwa uthi bafuna kulungisiswe konke okuhluphayo ngokuphangisa.