Inhlanganiso ebona ngokuqhutshwa kokhetho eye Zimbabwe Election Support Network, i ZESN ithi kufanele kube lembiko yokwazisa uzulu ngodlakela oluyabe lukhona ngesikhathi sokhetho, ukwenzela ukuthi inengi lingalahlekelwa yimphefumulo njengalokhu okwenzakala kukhetho olwedluleyo.
Inhlanganiso le ithi umumo usuvele usumubi, ikakhulu emaphandleni ezigabeni ze Mashonaland, lapho abasekeli bebandla le MDC kanye lamalunga enhlanganiso ezizimeleyo asebatshelwa ukuthi bengalugxobi kwezinye iziqinti.
Lokhu kwenzakala inhlanganiso ye Zimbabwe Peace Project layo isanda kwethula umbiko othi kubhubhe umsekeli webandla le ZANU PF e Masvingo ngenxa yodlakela lwezombusazwe.
UMnu. Edwin Ndlovu, isiphathamandla secele le MDC elikhokhelwa nguMnu. Arthur Mutambara se Matabeleland utshele uSithandekile Mhlanga oweStudio 7 ukuthi amalunga ebandla lakhe ahlukuluzwa kakhulu ezigabeni ezise Mashonaland.