Uhulumende we Zimbabwe ubikwa encedisa izizalwane zeZimbabwe eziseSouth Africa ezedlula inkulungwane ngelanga ukuthola incwadi zama passport, ezizancedisa ukuthi bethole amaphepha okuhlala, ukufunda, kanye lokusebenza kulelolizwe ngokusemthethweni, njalo indwendwe ezinde ebe zibonakala azisekho.
Kodwa uMnu. Remember Moyo, isiphathamandla secele le MDC elikhokhelwa nguMnu. Morgan Tsvangirai, uthi lanxa kunjalo, abantu abatholi amaphepha abawadingayo ngesikhathi esifaneleyo, njalo incwadi zokuzalwa kanye lezithupha azitholakali lula kuhulumende we Zimbabwe.
UMoyo utshele uSithandekile Mhlanga we Studio 7 ukuthi ubhoda-bhode lesiphathamandla sebandla lakhe, uMnu. Lovemore Moyo ngolweSine lapho okulungiswa khona amaphepha la wazibonela ngawakhe okwenzakalayo.