Amabandla ezombusazwe kanye lenhlanganiso ezizimeleyo zithi zemukela ngemizwa etshiyeneyo ukubhubha kowayengumongameli we Korea uMnu. Kim Jong IL ukufa kwakhe okumenyezelwe ngeSonto.
Ibandla le ZANU PF lithi liyamkhalela umuyi uMnu. Jong IL ngoba eleKorea lancedisa eleZimbabwe kakhulu ekutholeni uzibuse, kodwa ibandla le ZAPU lemacele womabili eMDC esithi kasoze athontise inyembezi zokukhalela umuyi ngoba wancedisa ukulolonga ibutho le Fifth Brigade.
Ibutho le Fifth Brigade labulala abantu bemaNdebeleni lenkabazwe, ababikwa besedlula inkulungwane ezingamatshumi amabili, 20 000 ngesikhathi seGukurahundi ilizwe lisanda thola uzibuse.
UMnu. Mbuso Fuzwayo, isiphathamandla senhlanganiso elwela ilungelo loluntu eye Ibhetshu Likazulu, utshele uSithandekile Mhlanga weStudio ukuthi njengoba ele Korea lalikwazi ukuthi eleZimbabwe laselitholile uzibuse, kwakungafanelanga uKim Jong IL, yena owayengomunye wabokhelheli bebutho ngalesosikhathi kusabusa uyise, ancedise ekulolongeni ibutho le Fifth Brigade.