UMayor we Victoria Fassl uMnu. Nkosilathi Jiyane, oyisiphathamandla secele le MDC elikhokhelwa nguMnu. Morgan Tsvangirai ubikwa esetshiye ibandla lakhe ngoba esithi liyamhlukuluza, kodwa ulokhe ephethe isikhundla sokuba ngumayor walelidolobho.
Lokhu kwenzakala uMayor we Kariba, uMnu Nicholas Hwindiri, oyisiphathamandla salelibandla, laye ebikwa sewatshiya lelibandla njalo esesebenza ezimele.
Kunyanga ezimbalwa ezedluleyo, inengi lamakhansila e Victoria Falls amsole kakubi uJiyane esithi usebenzelana lebandla le ZANU PF, njalo kaqhubi kuhle umsebenzi wakhe. Kodwa uMnu. Ignatious Chombo umphathintambo obona ngentuthuko yezabelo lamadolobho, ubikwa elaye ukuthi engamiswa umsebenzi ngoba engelacala.
IStudio 7 ayenelisanga ukukhuluma loJiyane ngaloludaba, kodwa encwadini abikwa eyilobele ibandla lakhe, uthi iziphathamandla ze MDC, ezigoqela intsha labanye abangazi lutho ngomsebenzi wekhansili, bayangenela emsebenzini wakhe, osokubangela ukuthi engasebenzi kuhle, njalo engahlaliseki kuhle kanye lemuli yakhe.
UNkosazana Thabitha Khumalo, umsekeli wesikhulumi salelibandla, utshele uSithandekile Mhlanga we Studio 7 ukuthi abakemukeli umbiko kaMnu. Jiyane ngokusemthethweni.