Umkhokheli welinye lamacele eMDC uMnu. Arthur Mutambara uthi ubevele engazimiselanga ukuthi ancintise njengomkhokheli walelibandla kukhetho oluzayo.
Lokhu kulandela ukhetho oluqhutshwe eHarare ngolweSine, lapho unobhala jikelele walelibandla, uMnu. Welshman Ncube akhethwe khona ukuthi abe nguye ozancintisa ukuba ngumongameli walelibandla emhlanganweni weCongress ozakwenziwa ngenyanga ezayo.
Ezinye izigaba zelizwe zikhangelelwe ukuthi ziqhube ukhetho olufana lolwe Harare kungakafiki umhlaka 22 wayonale inyanga.
Isikhulumi salelibandla ko Bulawayo, uMnu. Edwin Ndlovu, utshele uSithandekile Mhlanga weStudio 7 ukuthi lesisigaba sizaqhuba lolukhetho kusasa.