Ukungezwani phakathi kwamalunga eNsonto ye Anglican eHarare kuvele sobala lapho kusenziwa umthandazo owandlulele ukungcwatshwa kukamuyi uMnumzana Elias Gwata wenzelwe phandle kwalinsonto, kuswelakale isihluthulelo sokuthi amalunga avule inkonzo emvalelisele phakathi.
Umuyi, uGwata, wake waba ngumsakazi we Zimbabwe Broadcasting Cooperation, njalo wayeyisiphathamandla se nsonto ye Anglican.
Umphathintambo kahulumende obona ngezokwethulwa kwembiko, uMnu. Webster Shamu, ubikwa eze wakhuza amalunga alelibandla emngcwabeni kaGwata e Warren Hills, ngoMvulo, esithi ebambane, engalwi, ikakhulu lapho kufiwe. Amacele amabili alelibandla, elinye elikhokhekwa nguBishop Chad Gandiya lelikhokhelwa ngu Archbishop Nolbert Kunonga, aphakathi kokulwa okwesabekayo, njalo inengi lamalunga asekela icele lika Kunonga bebengekho emngcwabeni ka Gwata.
UArchbishop we Cantebury le York, odokotela Rowan Williams lo John Sentamu, sebethule umbiko besola ukuxokozela okwenzakala kulelibandla .
USithandekile Mhlanga we Studio 7 uxoxe lelunga lalelibandla, uMnumzana John Masuku, ukuze sizwe okunengi ngaloludaba.
USithandekile Mhlanga uphinde waxoxa lo Mnumzana Isaac Mpofu, umlobi wengwalo, njalo eyingcwethi kwezokholo, ukuze sizwe imbono yakhe ngokuthi kungani ukulwa kanye lokungenela kwezombusazwe sokusanda ezinkonzweni.