Ibandla eliphikisayo kweleSouth Africa eleDemocratic Alliance ngoMvulo likhuthaze uMongameli Jacob Zuma, okhangelelwe ukwethekelela kwele Bhilithani kuliviki ukuthi akhuthaze uhulumende wakulelo lizwe ukuthi eqhubeke esekela ukuqheliswa kwezijeziso ezafakelwa uMongameli Robert Mugabe labanye bakhe abe Zanu Pf, ngumanyano weEuropean Union.
Iwofisi kaZuma yona ithi ukhangelelwe ukucela inhloko kahulumende yeleBhilithani uMnumzana Gordon Brown ukuthi asekele ukwesulwa kwezijeziso yiEuropean Union ngoba esithi zenqabela intuthuko eZimbabwe.
Ibandla leDemocratic Alliance lithi uZuma kumele aphathe njalo udaba lomthetho weIndigenisation and Economic Empowerment wona oqale ukusebenza ngoMvulo eZimbabwe lanxa nje icele leMDC elikhokhelwa yinhloko kahulumende uMnumzana Morgan Tsvangirai liphikisa ukwethulwa komthetho lo.
I DA yengeze yathi eleSouth Africa kumele lalo lifakele uMugabe labanye bakhe kuZanu PF izijeziso, isithi akula nguquko esibe khona kwezombusazwe lanxa iZanu PF sibusa ibambisane leMDC.
Ingcwethi ecubungula ezombusazwe uMnumzana Rejoyce Ngwenya utshele uNtungamili Nkomo weStudio 7 ukuthi usekela amazwi eDA.