Umthetho ophathelane lezabamabhizimusi owe Indigenisation and Economic Empowerment Act uqale ukusebenza ngoMvulo mhlaka 1 ngoMbimbitho, njalo amankampani asephiwe inyanga lengxenye ukuthi alobe ingwalo ezikhomba abanikazi balamankampani.
Phansi kwalumthetho, abamhlophe abangabanini bamankampani abiza imali esuka kumadola ayingxenye yesigidi, kuzamele bathengisele abensundu isilinganiso sokwedlula amatshumi amahlanu ekhulwini-51% samankampani abo.
USithandekile Mhlanga we Studio 7 uxoxe loMnu. George Mkhwananzi, ingcwethi ecubungula ezomnotho welizwe.
Kusenjalo, abaninibhizimisi bako Bulawayo bathi akumelanga uhulumende adilize amafekithali lamankampani awemazweni ekuqaliseni kokusebenza komthetho owe Indigenization.
UMnu. Jabulani Nkomo umgcinisihlalo we Zimbabwe National Chamber of Commerce utshele i Studio 7 ukuthi osomabhizimisi batshele uMnu. Saviour Kasukuwere umphathintambo wogatsha olubona ngezabatsha kanye lezamabhizimusi ukuthi nxa soluqutshwa uhlelo lolu akumelanga amankampani athathwe ngabantu abanothileyo.
UMnu. Nkomo utshele uGibbs Dube we Studio 7 ukuthi bakhuthaze u Kasukuwere lomsekeli wakhe uMnu. Thamsanqa Mahlangu ukuthi kumele uhlelo lolu lungabi lenkethabetshabi.