Ingcwethi kwezemidlalo yokuzithokozisa, uMnu. Styx Mhlanga, uze wakhululwa ngolweSithathu esitokisini ngemva kokuvalelwa ngoMvulo esetheswa icala lokutshaya kakubi umlobi obebhale inkondlo encoma amaqhawe agoqela uMongameli Robert Mugabe labanye, kodwa ekhekheleza awe Matabeleland.
UMhlanga ubikwa ekhonone ngokuthi kungani inkondlo le ingancomanga amanye amaqhawe eMatabeleland agoqela umuyi uMnu. Joshua Nkomo, lababengabebutho le ZIPRA abagoqela uMnu. John Nkomo, uMnu. Dumiso Dabengwa, labanye, ukuze yamukeleke elizweni lonke, hatshi ezigabeni ze Mashonaland kuphela.
Obhale inkondlo, yena osengumamangala ubikwa engathakazelelanga insolo ka Mhlanga, kwacina kukhala inqindi, kwaze kwabizwa amapholisa, uMhlanga wavalelwa, esetheswa icala lokutshaya omunye. Umamangala ubikwa esesithi uMhlanga umqamule imbambo okubangele ukuthi icala likaMhlanga liphose liguqulwe kuthiwe ngelokufuna ukubulala umuntu, kumbe elokuthuka uMugabe. Kodwa abakade bekhona bathi uMhlanga nguye ogame umamangala esesiwa ku balcony ye Art Gallery.
UMhlanga utshele uSithandekile Mhlanga we Studio 7 ukuthi langempela uthe eyifunda inkondlo kamamangala wafumana ukuthi ilobandlululo olwesabekayo, njalo inkondlo akumelanga yehlukanise abantu ngomhlobo.
UMnu. Lizwe Jamela, igqwetha elimela uMhlanga uthi amapholisa athe azababiza ngamasamanisi nxa kudingeka, kodwa kusobala ngobufakazi obukhona ukuthi uMhlanga kalacala.