Inhlanganiso ekhankasela ukulondolozwa kwelungelo loluntu iZimbabwe Peace Project ithi kulenkokheli yosika esithwalise uzulu weMasvingo North amagabha avuzayo ngoba esala ukunanza osobhuku abakhethwe yiZanu PF.
Egwalweni elwethule ngoLwesithathu linhlanganiso ithe izakhamizi eziphansi kwenduna uGurajena loZimuto sezaziswe ukuba kumele zihlawule amadola angamatshumi ayisikhombisa, US$70 kumbe imbuzi ezimbili njengesijeziso sokwala ukuthenga amacard eZanu PF kanye lokwala ukwamukela osobhuku balelibandla.
Osobhuku laba babikwa befakwe ezikhundleni phansi kohlelo lokudingela iZanu PF usekelo phambilini kokhetho uMongameli Mugabe athi ufuna lwenziwe ngomnyaka ozayo.
Izinduna ezenze umhlangano eKariba kumaviki edluleyo zivumelene ukuba zizasekela uMugabe kukhetho oluzayo.
I ZPP ithe abangafuniyo ukuthenga amacard eZanu PF, ukuhlawula imali yesijeziso kumbe ukuhlawula ngembuzi sebetshelwe ukuba kumele bephume baphele kulumango.
I Masvingo North imelwa lilunga leZanu PF edale lephalamende uMnu Stan Mudenge, ongumphathintambo wezemfundo yaphezulu.
Umgcinisihlalo weZanu PF eMasvingo uMnu Lovemore Matuke uthe ingamanga aluhlaza tshoko imbiko yeZPP.
Ukuhlaziya loludaba sixhume ingcwethi ecubungula ezombusazwe uMnu Effie Dlela Ncube othe kulihlazo okwenziwa yizinduna lezi.