Umgcinisihlalo weSadc Troika njalo enguMongameli weleZambia uMnu Ruphia Banda loMongameli Jacob Zuma weleSouth Africa bakhuthaze amazwe afana leMelika leBhilithani ukuthi esile izijeziso azethulela iziphathamandla zeZanu PF, besithi zigwenxa imizamo yabo yokulungisa udaba lweZimbabwe.
Ababili laba bethule inkuthazo le bekhuluma lentathelizindaba ePretoria nngolweSine kulandela umhlangano abawenzileyo bekhuluma ngokutshiyeneyo okugoqela ukudonselana okukhona kuhulumende womanyano phakathi kweZanu PF leMDC.
Emhlanganweni lo, uZuma wazise uMongameli Banda ngohambo lwakhe eZimbabwe kumaviki amabili edluleyo lapho ahlangane loMongameli Robert Mugabe, uMnu Morgan Tsvangirai loMnu Arthur Mutambara ngokufuthelana okukhona kuhulumende.
UZuma uthe njalo amabandla ezombusazwe eZimbabwe akhanya sekhangelele ukuthi kwenziwe ukhetho olutsha.
UMongameli Banda yena uthi iSadc Troika izahlangana ngoZibandlela ihlaziya udaba lweZimbabwe. AbeMDC bathi bebekhangelele ukuba umhlangano lo wenziwe umnyaka lo ungakapheli. Ukuhlaziya loludaba uNtungamili Nkomo uxhume ingcwethi ecubungula ezombusazwe uMnu George Mkhwanazi.