Uhlangothi olubona ngezemisakazo olwe Broadcasting Authority Zimbabwe luthi zinengi inhlanganiso ezibhalele zicela ukuphiwa amalayisensi okusungula imisakazo. Loluhlangothi lwazise ngenyanga edluleyo ukuthi luzanikeza amalayisensi okusakaza kumankampani amabili kuphela awohlobo lwe Commercial Broadcasting. Kulenhlanganiso ezedlula itshumi lasithupha ezibikwa zithumele incwadi zokufuna ukusakaza.
Abafuna ukusakaza baphiwe kuze kube ngoLwesine lweviki ezayo. Kudingakala inkulungwane ezedlula ezingamatshumi amathathu ukufaka isicelo sokudinga ilayisensi. Osekumangalise abanengi yikuthi phakathi kwabonke asebefake isicelo sokudinga amalayisensi akwaziwa ngitsho loyedwa.
Umqondisi wenhlanganiso ye MISA - Zimbabwe uMnu. Nhlanhla Ngwenya utshele iStudio Seven ukuthi kuzavela ngeviki ezayo ukuthi kuliqiniso na ukuthi sekuzaba lemisakazo ezimeleyo kumbe lize.