UMongameli Robert Mugabe uphindele kweleSingapore ngoLwesine ukuyahlolwa ngodokotela okwesithathu selokhu umnyaka uqalileyo.
Ubekulelolizwe njalo kumaviki amabili edluleyo. Isikhulumeli sehofisi yakhe uMnu George Charamba uveze ukuthi uMugabe uyebonana labodokotela bamehlo abaqalise ukumelapha ngoZibandlela.
Wengeze wathi uzaphindela ekhaya ngeSonto. Ekhuluma emkhosini wokunanza ilanga lakhe lokuzalwa ngempelaviki, uMugabe uvumile ukuba seluphele.
Kodwa uthe ubuchopho bakhe bulokhe busebenza njengobomuntu omutsha. NgolweSithathu khona usungule uhlelo lokukhankasela ukwesulwa kwezijeziso zenotho ezafakelwa yena labanye bakhe kuZanu PF ekhanya ephilile.
Lanxa uCharamba esithi uMugabe ubulawa ngamehlo, bakhona abathi engaba edliwa ngeminye imikhuhlane evame ukuhlasela asebeluphele efana lemvukuzane, okuyinto ayilandulayo yena ngokwakhe.
Ingcwethi ecubungula ezombusazwe uMnu Mqondobanzi Magonya utshele uNtungamili Nkomo weStudio 7 ukuthi uMugabe ufuna ukufela esihlalweni.
