amalinks wokungena

Breaking News

IZanu PF Ibumba Amakomidi Okucwayisisa Ezentuthuko EMatabeleland


Ibandla leZanu PF selibumbe amakomidi amahlanu azakhangela ukusilela kwentuthuko ezigabeni zeMatabeleland ngenjongo yokulungisisa loludaba.

Inkokheli yebandla leli eMatabeleland, ikhokhelwa nguMnu John Nkomo, isungule amakomidi la emhlanganweni oqhutshelwe koBulawayo ngeSonto.

Amakomidi la abalisa eyezemfundo, eyezenotho, eyezempilakahle, ebona ngezamanzi kanye lebona ngezakhiwo.

Uzulu weMatabeleland uhlezi ekhala ngokusalela muva kwalezizigaba kwezentuthuko, esola ikakhulu uhulumende weZanu PF.

Ukubunjwa kwamakomidi la sokucunule kakhulu ezinye iziphathamandla zeZanu PF ezivela kwezinye izigaba ezithi ukukhangela udaba lweMandebeleni yikuphambanisa ngoba zizinengi izabelo ezisalela muva kwezentuthuko njengeMatabeleland North leSouth.

Abanye, ikakhulu abacubungula ezombusazwe bathi iZanu PF sizama ukudinga usekelo kuzulu weMatabeleland ngoba ilizwe libhekane lokhetho.

Amacele womabili eMDC ayavumelana ekuthini ngempela iMatabeleland yiyo esilelayo ukwedlula zonke izigaba zelizwe kwezentuthuko.

Okhokhela ikomidi ezacwayisisa inhlelo zenotho ezingenziwa ukuthuthisa iMatabeleland, engumphathintambo njalo obona ngezemigodi uMnu Obert Mpofu, utshele uNtungamili Nkomo weStudio 7 ukuthi injongo yabo emqoka yikuthuthukisa izigaba zeMatebeleland, hatshi ukudinga usekelo.

Ingcwethi ecubungula ezombusazwe uMnu Effie Dlela Ncube uthe kalakuthandabuza ukuthi ibandla leZanu PF selizama ukudinga usekelo kuzakhamizi zeMatabeleland ngokwethembisa ukuthuthukisa lesisigaba.

XS
SM
MD
LG