IMDC ekhokhelwa nguMnu Welshman Ncube silobele uMongameli Jacob Zuma weleSouth Africa imcela ukuba angenele kungxabano esikhona kuyo lowake wayikhokhela uMnu Arthur Mutambara.
Ngakolunye uhlangothi, uMutambara laye selobele uZuma ngokufanayo.
Encwadini ayithumele uZuma kuliviki, unobhala jikelele weMDC-N, uNkosikazi Priscilla Misihairambwi-Mushonga ucele uZuma ukuthi alethe ndawonye amabandla womathathu akuhulumende kuxoxwe ngodaba lokwalela kukaMutambara esikhundleni somsekeli wenhloko kahulumende.
Uthe ibandla lakhe lifuna njalo ukuba kuguqulwe isivumelwano seGlobal Political Agreement sitsho ukuba uMutambara semela iZanu PF kuhulumende hatshi iMDC ngoba engasenguye umkhokheli webandla.
UNkosikazi Misihairambwi-Mushonga uthe ibandla lakhe lifuna udaba lukaMutambara lulungisiswe ngokuphangisa ukuze libhekane lezinye inhlelo ezibalulekileyo eziphathelane lenhlalakahle kazulu.
UMnu Zuma yena uzathumela iqula lakhe eHarare ngeviki ezayo ukuyaluphatha loludaba kanye lodaba lomhlahlandlela wokhetho oluzayo.
Omunye wabacebisi bakhe uNkosazana Lindiwe Zulu uthi bazaluphatha udaba lokudonselana kweMDC kaNcube bengafika eHarare. Kodwa uthe udaba lolu ngolwebandla njalo uMnu Zuma kasoze aluphathe kangako.
