Ingqwethakhulu likahulumende uMnu Johannes Tomana uthi seqoqe iqula lamagqwetha azakuya emthethwandaba weEuropean Court of Justice eBelgium ngeviki ezayo ukuyaphikisa izijeziso ezafakelwa uMongameli Mugabe leziphathamandla zeZanu PF ezedlula ikhulu ngamazwe eEurope.
UMnu Tomana uthi izijeziso lezi azikho emthethweni ngoba iEuropean Union ingazange icele imvumo kuUnited Nations ngesikhathi zifakwa njalo kumele zesulwe.
Iphephandaba leHerald lithi iqula likaTomana leli lilamagqwethwa eZimbabwe lakwamanye amazwe, agoqela angaphetsheya.
Umanyano weEU wethule izijeziso lezi ngomnyaka ka2000 ukhonona ngobubi bombuso kaMongameli Mugabe.
Izijeziso lezi zivimba uMugabe labanye bakhe kuZanu PF ukuthi bethekelele emazweni aku EU. Zivimba njalo amankampani alobudlelwano leZanu PF ukuthi enze ibhizimusi lamazwe eEU.
UTomana uthi iqula lakhe lizafika likhulumisane leziphathamandla zeEuropean Council andubana zikweze udaba lwezijeziso edale leEU Court of Justice.
Igqwetha uMnu Matshobana Ncube utshele iStudio 7 ukuthi kaboni loludaba luphumelela emthethwandaba.
