Umahluli weHigh Court koBulawayo uJustice Nicholas Mathonsi ngoLwesine unqume ukubana intatheli yephephandaba leStandard uMnu Nqobani Ndlovu akhululwe, ngemva kokuba elahle isicelo sabatshutshisi sokuphikisa isinqumo esethulwe ngumantshi ngoMvulo sokuvumela uNdlovu ukuthi ahlawule imali yesibambiso njalo akhululwe.
Ekulahleni kwakhe isicelo sabatshutshisi lesi uJustice Mathonsi uthe asilamnkantsho, wathi njalo uNdlovu kumele akhululwe. UNdlovu ukhangelelwe ukukhululwa ngoLwesihlanu.
UNdlovu ubotshwe ngoLwesithathu ngeviki edluleyo esetheswa icala lokuloba udaba oluhlambaza amapholisa obelulakho njalo ukubangela umvukela phakathi kwamapholisa.
Umgcinisihlalo wenhlanganiso ekhankasela ukulondolozwa kwelungelo lentatheli elizweni eyeZimbabwe Union of Journalists uMnu Dumisani Sibanda uthe bajabule kakhulu ngesinqumo seHigh Court.
Wengeze wathi lanxa ezakhululwa ngoLwesihlanu uNqobani, intathelizindaba zakoBulawayo zizaqhubekela phambili ngokutshengisela ebezikuhlelile ngaphambilini ngoMvulo zikhonona ngokuhlukuluzwa ngamapholisa.
