Abasekeli beMDC abedlula amatshumi amabili abagoqela amalunga edale lephalamende athi uMnu Douglas Mwonzora loMnu Rodgers Tazviona ababotshwe kumaviki amabili edluleyo balokhu bevalelwe, okuyinto esolwa kakhulu yilelibandla.
Embikweni eliwethule ngoMvulo icele leMDC elikhokhelwa nguMnu Morgan Tsvangirai lisole kakhulu amapholisa lisithi asetshenziswa libandla leZanu PF ukuhlukuluza abasekeli balo kanye leziphathamandla zalo.
IMDC ithe njalo ifuna uMnu Job Sikhala, obotshwe ngempelaviki akhululwe kanye loMnu Munyaradzi Gwisai labanye bakhe abetheswa icala lokuqoqa umvukela.
Umsekeli wesikhulumeli seMDC kaTsvangirai uNkosazana Thabitha Khumalo utshele uNtungamili Nkomo weStudio 7 ukuthi ibandla lakhe lifuna bonke abasekeli balo ababotshiweyo bakhululwe ngoba amacala abawetheswayo engayisiwo eqiniso.
Kusenjalo, amasotsha ahlome ephelele abikwa enyakazela emalokitshini eHarare lapho akhangelelwe ukuchitha ukutshengisela okucatshangelwa ukuthi kungaqhutshwa nguzulu kusasa emizameni yokugenqula uhulumende njengalokhu okwenzakala emzaweni agoqela ele Egypt le Tunisia.
Izakhamizi ze Harare kanye lokhansila Paul Goregore we Mbare, zitshele iStudio 7 ukuthi amasotsha lamapholisa ohlobo olutshiyeneyo ayanyakazela kulelidolobho.
UNkosazana Magodonga Mahlangu, isiphathamandla senhlanganiso ye Women of Zimbabwe Arise, i WOZA, utshele uSithandekile Mhlanga we Studio 7 ukuthi ko Bulawayo amapholisa azigqokele ezawo engabe enyakazela ezitaladini ngoba abophe amalunga enhlanganiso yakhe ngoMvulo.
