Kuhlelo lokuzilibazisa namuhla njengoba sesilanda iKhisimusi sileqembu leNkedile Combination, lona elisanda kwethula idlalade lesibili elilesihloko esithi ‘Balandeli.’
Leliqembu lidabuka emangweni weBrunapeg, ePlumtree kodwa lihlabela likweleSouth Africa.
“Iqembu silisungule ngo2017. Siqale ngelinye idlalade sisaseliqembu ebelisaziwa ngokuthi ‘Osobunandi,’ sazotshintsha ibizo saba yiNkedile Combination,” kutsho umholi weqembu leli uNation Ndebele.
Idlalade leli lilengoma eziyisikhombisa ezigoqela ethi ‘Imbali Yami,’ ‘Sikhumbula Abaculi,’ ‘Bafana beNkedile,’ ‘Layani Abantwana,’ ‘AmaSociety,’ kanye lethi ‘Umngcwab’uhlehlile.’
UNdebele uthi abangathanda ukuthenga idlalade labo bangaxhumana lamalunga eqembu ngeWhatsApp kumbe ecingweni kunombolo ezithi +27788424668, +27642306713, +27631346025.
