amalinks wokungena

Breaking News

Uhulumende Kasahlalisekanga Ngodaba lweGukurahundi Ngemva Kokuhlokozwa Ngabafundisi beRoma


Udaba lweGukurahundi oluphathwe ngabafundisi besonto yeRoma encwadini abayilobe bekhonona ngokwephulwa kwamalungelo elizweni lukhanya soludale ukungahlaliseki kuhulumende, yena othi akumelanga abantu bakhulume ngalo mahlayana ngoba lulakho ukubangela ukufuthelana elizweni.

Inhlanganiso yabafundisi laba, eyeZimbabwe Catholic Bishops’ Conference (ZCBC), yethule incwadi le ngeviki edluleyo isola uhulumende kaMongameli Emmerson Mnangagwa isithi wephula amalungelo oluntu.

Ithi njalo ubuhlungu obuzwiwa ngabantu buza ngesikhathi inengi lilokhu lifuthelene ngodaba lokubulawa kwenkulungwane zabantu libutho le5th Brigade eMidlands laseMatabeleland.

Inhlanganiso le ithi izizukulwana zithukuthele kakhulu ngodaba lolu ngoba lulokhu lungakalungiswa.

Ephendula lumbiko izolo, umphathintambo obona ngezemithetho uMnu Ziyambi Ziyambi usole abafundisi laba esithi udaba lweGukuragundi luletha ukufuthelana elizweni, ngokunjalo akumelanga abantu badlale ngalo.

Uthe njalo uhulumende uphakathi kokukhulumisana lozulu weMatabeleland ngenjongo yokuphathisa labo abaphathwa yilumbuqazwe kubi ngezinto ezifana lezithupha zokuzalwa lezokubhubha komuntu, ama-death certificates.

UZiyambi wethese njalo abafundisi laba umlandu wokungenela kundaba zombusazwe esithi umbiko wabo awulanhlonipho kanti njalo weyisa uhulumende.

Isiphathamandla senhlanganiso elwela amalungelo oluntu eyeIbhetshu likazulu uMnu Mbuso Fuzwayo utshele lumsakazo ukuthi uhulumende usetshengise sobala ukuthi akazimiselanga ukululungisa udaba lweGukurahundi.

please wait

No media source currently available

0:00 0:02:51 0:00

Kunjalo, nje uMongameli Emmerson Mnangagwa laye usole abafundisi beRoma laba esithi sebengenela kwezombusazwe becatsha ngenkonzo.

UMnangagwa utshele idale leZanu PF Politburo izolo ukuthi uyakwazi njalo ukuthi kulabantu abazama ukumsusa embusweni, abagoqela abebandla lakhe.

Kulamalunga eZanu PF amabili axotshwe kulelibandla izolo esetheswa lelicala. Ababili laba babalisa owake waba ngumeli weMbare ephalamende uMnu Tendai Savanhu loNkosikazi Cleveria Chizema.

Ngeviki edluleyo kuxotshwe owake waba ngumeli wekambuzuma uMnu Tinashe Maduza ngesizatho esifanayo.

UMnangagwa ubevele ekhangelelwe ukukhuluma ngodaba lwabafundisi beRoma laba kulandela ukuhlambazwa kwabo ngumphathintambo obona ngokwethulwa kwembiko uNkosikazi Monica Mutsvangwa esithi bagcwele umoya kasatane.

UMutsvangwa waqopha njalo umkhokheli weZimbabwe Catholic Bishops Conference uArchbishop Robert Ndlovu esithi uzenya yena umeli waMaNdebele wona athi malutshwana eZimbabwe. Wathi njalo kulamanye awo azenza angcwele.

Isiphathamandla seZanu PF uMnu Joseph Tshuma utshele lumsakazo ukuthi lanxa engavumelani lamazwi kaMutsvangwa, akaMongameli Mnangagwa amqotho.

please wait

No media source currently available

0:00 0:02:36 0:00

Facebook Forum

XS
SM
MD
LG