WASHINGTON DC - Amapholisa akweleBotswana athi adubule abulala abanakanelwa ukuthi yizigebengu eziyisitshiyagalolunye, 9, ezibambe imota ethwala imali inkunzi eGaborone zatshontsha imali ephose ingene ku 1 million Pula izolo.
Isikhulumeli samapholisa uDipheko Motube wazise ukuthi izigebengu lezi yizizalwane zaseBotswana lezakweleSouth Africa, zona athi bezihlome ngeAK-47 lama-pistol.
Wengeze wathi kube lokulwisana phakathi kwamapholisa lezigebengu lezi, zona athi bezilitshumi lanye, 11, ngemva kokutshontsha limali eMain Mall, eGaborone, zabaleka.
Uthe kubotshwe owesifazana oyedwa, oyisizalwane saseBotswna obeyingxenye yalezizigebengu.
Lumbiko ulethe ukuhlaliseka kwabanye ngoba bekunakanelwa ukuthi lezizalwane zeZimbabwe zingaba ziphathekile kulesisehlakalo njengalokhu okwenzakale kweleSouth Africa ngoMvulo.
Kulesisehlakalo, amapholisa eSouth Africa, eJohannesburg, adubula abulala izigebengu eziyisithiyangalombili, 8, njalo abopha ezilitshumi ezigoqela izizalwane zeZimbabwe ezazizame ukubamba imota ethwala imali inkunzi.
