WASHINGTON DC - Kukhale imibhobho kwaba luthuli eRosettenville, kweleSouth Africa, izolo amapholisa elwisana labanakanelwa ukuthi yizigebengu ezigoqela izizalwane zeZimbabwe ebeziqoqa ukubamba imota ethwala imali inkunzi zihlome ngamaAK-47, kwafa eziyisitshiyangalombili.
Umphathintambo obona ngokusebenza kwamapholisa uMnu Bheki Cele utshele intathelizindaba ukuthi izigebengu lezi bezingamatshumi amabili lanhlanu, 25.
Uthe babulale eziyisitshiyangalombili, 8, njalo babopha inani elifanayo. Wengeze wathi eziyisitshiyagalolunye zibalekile.
UCele uveze ukuthi ezinengi zezigebengu lezi yizizalwane zeZimbabwe. Uthe ezine ngezaseSouth Africa ezivela Kwazulu Natal kuthi esisodwa yisizalwane sakweleBotswana.
Kubikwa kulimale amapholisa amahlanu. Amanye awo ebehamba nge-helicopter ephatheke ekulwisaneni lokhu.
Imisakazo yakweleSouth Africa yethule ama-video lezithombe eziveze izidumbu ebezisopha igazi zithe daca emgwaqweni kuthi ezinye bezisemoteni yohlobo lweBMW, engenye yezimota zohlonzi lwaphezulu ebezisetshenziswa yizigebengu lezi.
Akukacaci kuhle ukuthi abeZimbabwe bangaki phakathi kwabafileyo, kulabo ababalekileyo kanye lakulabo ababotshiweyo.
