WASHINGTON DC – Ubotshiwe umkhokheli wenhlanganiso yeOperation Dudula, yona ehlukuluza izizalwane zakwamanye amazwe isithi kumele ziphume ziphele kweleSouth Africa.
UMnu Nhlanhla Lux Dlamini ubotshwe izolo ngemva kokumangalelwa libandla leEconomic Freedom Fighters (EFF), lisithi watshaya ilunga lalo ngemva kokulingenela endlini elethesa umlandu wokuthengisa izidakamizwa lisebenzelana labantu bokuza.
Amalunga eOperation Dududla athwalise uzulu gadalala ngokuhamba engenela abavela kwamanye amazwe, okugoqela abeZimbabwe, esithi abasuke kweleSouth Africa babuyele emazweni abo.
UDlamini uzamiswa enkantolo yeRoodepoort, eJohannesburg namuhla, kubike umsakazo weSABC.
Isiphathamandla senhlanganiso yeZimbabwe Community in South Africa uMnu Bongani Mkhwanazi utshele iStudio 7 ukuthi akubamangalisi ukubotshwa kukaDlamini ngoba akwenzayo kuyikwephuma umthetho.
Kusenjalo, kuqhamuke udlakela edolobheni leCape Town izolo osomatekisi batshisa izimota lamabhasi bekhonona ngokudula kwezinto ezitolo.
Lokhu kwethuse abantu bokuza sebecabangela ukuthi loludlame lungaba luqondiswe kubo luvelela kunhlanganiso yeOperation Dudula.
Kodwa isizalwane seZimbabwe esihlala eCape Town uMnu Ephraim Sibanda utshele iStudio 7 ukuthi bekungosomatekisi abathukuthele ngokukhuphuka kwentengo yempahla etshiyeneyo.
