WASHINGTON DC - Ugatsha olubona ngokulotshwa kwemihloliso olweZimsec solwethule uluhlu lwenhlawulo yemihloliso ezalotshwa ekupheleni komnyaka ngoLwezi, ama-examination fees, ahlelwe ngedola leMelika.
Kodwa luthi limali kumele ibhadalwe ngedola leZimbabwe kusiya ngokuthi isisindo salo siyabe simi njani nxa liqathaniswa leleMelika ngosuku lapho umuntu ebhadala kusukela mhlaka 22 ngenyanga ezayo kusiya kumhlaka 29.
Luthi abaloba imihloliso kaGrade 7, eyeO’ Level kanye leyeA’ Level abafunda ezikolo zikahulumende, ezamakhansili kanye lezamasonto ezingatholi nzuzo bazancediswa nguhulumende ukubhadala limali.
Ukuze umfundi alobe imihloso kaGrade 7 kudingeka ukuthi ahlawule imali yeZimbabwe elingana lamadola aseMelika angamatshumi amabili lambili, US$22, okuyimali ezagoqela zonke izifundo azibhalayo.
Uhulumende uthi phakathi kwalimali, uzahlawulela umfundi ngamunye iUS$12, okutsho ukuthi abazali bazabhadala imali elingana leUS$10.
Imihloliso yeO’ Level ibiza amadola angamatshumi amabili lane, US$24, ngamunye. Phakathi kwalimali, uhulumende uzancedisa ngeUS$13, kuthi umfundi yena abesebhadala elingana leUS$11 umhloliso ngamunye.
Imihloliso yeA’ Level yona ibiza amadola eMelika angamatshumi phose amahlanu ngamunye, US$48. Uhulumende uthi uzabhadalela umfundi lomfundi iUS$26 ngamhloliso kuthi umfundi yena abesehlawula imali yeZimbabwe elingana leUS$22.
Abafunda ezikolo ezizimeleyo bona abasoze baluthole usizo lukahulumende.
Uzulu uthi lanxa uhulumende esithi limali kumele ibhadalwe ngedola leZimbabwe, kufanana lokuthi ihlawulwa ngemali yeMelika nanku ihlelwe kukhangelwa yona.
Isikhulumeli senhlanganiso emela ababalisi bemaphandleni, iARTUZ, uMnu Thembakuye Moyo uthi abafundi abanengi abasoze bayenelise limali, okutsho ukuthi bazakwehluleka ukubhala imihloliso yabo.
Amazwi kaMoyo agcizelelwe yisiphathamandla senhlanganiso emela abathengi, iNational Consumer Rights Association, uMnu Effie Dlela Ncube.
