amalinks wokungena

Breaking News

Yekelani Ukusebenzisa iMorning After Pill Mahlayana Ngoba Izalivalela Inzalo, Kuxwayisa abeFamily Planning


Packaging for the Plan B One-Step (levonorgestrel) tablet, one of the brands known as the "morning-after pill." (undated photo)
Packaging for the Plan B One-Step (levonorgestrel) tablet, one of the brands known as the "morning-after pill." (undated photo)

BULAWAYO - Ugatsha olubona ngenhlelo zokwelamisa, olweZimbabwe Family Planning Council, solutshele amakhemisi ukuthi axwayise amantombazana phezu kokusebenzisa iphilisi lokuvikela ukuzithwala, iMorning After Pill, mahlayana ngoba lingawaphazamisela impilakahle.

Iphilisi leli linathwa ngowesifazana ngenjongo yokwenqabela ukuzithwala nxa ethe waya emacansini lowesilisa bengazivikelanga.

Kodwa iZimbabwe Family Planning Council ithi iphilisi leli lingaba lomthelela omubi ogoqela ukuvimba inzalo nxa lingasetshenziswa ngemfanelo.

Lolugatsha luthi solunanzelele ukuthi amantombazana akulezinsuku aselisebenzisa ngendlela engayisiyo ngoba esesiya emacansini mahlayana nje. Ngokunjalo, luthi kumele aqaphele.

“Kuvamile ukuthi abantwana abanengi abasakhulayo balisebenzise mahlayana leliphilisi, kutsho isiphathamandla seZimbabwe Family Planning Council uMnu Mission Gwafa.

“Esikufisayo yikuthi bazihloniphe bacabange kabili. Okunye okumqoka ngephilisi leli yikuthi alivikeli imikhuhlane yemacansini, livikela kuphela ukuthi umuntu engazithwali. Ukulisebenzisa nsuku zonke kuguqula isimo somzimba wakho esiyimvelo.”

Abezempilakahle labo bathi abakukhuthazi ukusetshenziswa mahlayana kwaleli philisi. Bathi umuntu engalisebenzisa nxa ethe waya emacansini engazivikelanga hatshi ukuthi lisetshenziswe njalo nje sokuyiyo indlela emqoka yokuzivikela lokulamisa.

“Amaphilisi lawa ayafana lamanye aweFamily Planning. Kuba yingozi kakhulu emuntwini nxa engajwayela ukuwasebenzisa ngoba kuyabe kuphazamisa isimo sakhe, umzimba wakhe ngendlela engajayelekanga,” kutsho umongi uMnu David Sithole.

Isakhamuzi sakoBulawayo uNkosikazi Sanele Mathuthu uthe abantwana sebesenza okungabalimaza ngokujaha izinto.

“Sengananzelela ukuthi abantwana sebeqala amacansi bebancinyane, okubafaka engozini yokuthi babanjwe yimikhuhlane eminengi,” kutsho uNkosazana Mathuthu.

I-Morning After Pill ikhangelelwe ukuvikela owesifazana ekuzithwaleni nxa inathwe kungakedluli insuku ezintathu ngemva kokuya emacansini kungela kuzivikela.

Kodwa ayivikeli imikhuhlane yocansi efana leHIV/Aids.

please wait

No media source currently available

0:00 0:04:20 0:00

XS
SM
MD
LG