WASHINGTON DC - Umkhokheli weCCC uMnu Nelson Chamisa uthi engangena embusweni, uhulumende wakhe uzamisa ukusetshenziswa kwedola leZimbabwe kusetshenziswe eleMelika ukuze umnotho uhlaliseke.
Kumbiko awethule enkundleni yeTwitter, uMnu Chamisa uthe kubalulekile ukuthi ilizwe lisebenzise imali yeMelika njengalokho okwenziwa ngomnyaka ka2009 ngoba sokusobala ukuthi idola leZimbabwe alilahlonzi, nanku liqhubeka ligugudeka mihla ngemihla.
Amazwi kaChamisa aza ngesikhathi ababalisi labezempilakahle bephakathi kokukhalala umsebenzi besithi bafuna ukubhadalwa ngedola leMelika.
UChamisa wengeze wathi uhulumende wakhe uzaqeda njalo inkohlakalo, yona athi isibhahile kakhulu elizweni. Uthe njalo idola leZimbabwe lizaphenduka nxa umnotho usuqinile.
Amazwi akhe agcizelelwe lilunga lebandla lakhe njalo engusomabhizimusi uMnu Abednico Bhebhe.
Kodwa ingcwethi kwezenotho uMnu Reggie Shoko uthi ngomumo okhona khathesi, akulula ukuthi ilizwe libuyele ekusebenziseni idola leMelika ngokugcweleyo ngoba ayikho leyomali emabhanga.
