WASHINGTON DC - Ikhansili yakoBulawayo isiguqule indlela ebhadalisa ngayo abantu abapaka izimota enzikini yedolobho kulandela ukukhonona kwabahlali.
Umsebenzi wokubhadalisa abanikazi bezimota lo uphethwe yinkampani yeTendy Three Investments, yona esebenza lomasipala.
Phansi komthetho obukhona, umuntu ubehlawuliswa idola leMelika elilodwa, US$1, engapaka imota okwehola elilodwa endaweni ehleliweyo, i-parking bay.
Ubesithi engasuka kuleyondawo lanxa ihola lingakeneli ayepaka kwenye, ahlawuliswe elinye njalo idola, okuyinto ebangele ukukhonona okukhulu ebantwini abanengi besithi lokho akulangqondo kanti lemali yakhona iphezulu kakhulu.
Kodwa kumbiko ewethule ngoLwesithathu, ikhansili yazise ukuthi umuntu engapaka endaweni thize ahlawule idola, usesenelisa ukusuka ayepaka kwenye indawo elokhe esebenzisa itshintshi nxa ihola lingakeneli.
Kodwa isiphathamandla senhlanganiso yabahlali, eyeBulawayo Progressive Residents Association, uMnu Thembelani Dube uthi inguquko le ayitsho lutho.
UDube utshele iStudio 7 ukuthi bafuna uhulumende abhadalise abapaka izimota idola kumbe amadola amabili eMelika ngelanga hatshi ngehola njengalokhu okwenzakalayo ngoba ingeneliswa ngabanengi leyomali.
