WASHINGTON DC - Umanyano weSadc ngoLwesithathu uphe umuyi uMnu Robert Mugabe isicoco sokuhlonipha imisebenzi yakhe ndawonye labanye abake baba ngabakhokheli bamazwe asezansi yeAfrica abayibo abawusungulayo.
Isicoco lesi samukelwe nguNkosikazi Grace Mugabe emhlanganweni weSadc Summit osaqhubekayo kweleDRC ongenwe ngabakhokheli bamazwe akulumanyano abagoqela uMongameli Emmerson Mnangagwa.
Abanye abaphiwe izicoco lezi babalisa uSeretse Khama oweBotswana, Kenneth Kaunda owaseZambia, Julius Nyerere oweTanzania, uKamuzu Banda oweMalawi, uKing Sobhuza II oweEswatini kanye loAugustino Neto owaseAngola.
Bonke sebabhubha njalo izicoco zabo ziphiwe imindeni yabo, bebongwa yinkokheli yeSadc ngokusungula lumanyano kanye lokubambisana besebenzela uzulu.
Imifanekiso esenkundleni ezitshiyeneyo iveza uGrace esamukela isicoco somkakhe ebambane loMnangagwa, yena obekhanya ebobotheka kodwa uGrace ubebophe ubuso.
Ilunga leZanu PF uMnu Believe Gaule utshele iStudio 7 ukuthi iSadc yenze kuhle kakhulu ngokupha uMugabe labanye bakhe lezizicoco.
Kodwa ohlaziya ezombusazwe uDr. Jethro Mpofu uthe akula sizatho esiqnileyo sokuthi uMugabe ahlonitshwe ngalindlela ngoba wayengumbusi omubi.
