WASHINGTON DC - UMongameli waseMelika uMnu Joe Biden wethule amazwi akhe emhlanganweni weUnited Nations General Assembly ngoLwesithathu lapho achothoze khona eleRussia ngokwethusela ukuhlasela amanye amazwe ngezikhali zembhubhiso, i-nuclear, alubana ethe angenela empini yalo leleUkraine.
Amazwi kaBiden aza ngemva kokuba uMongameli waseRussia uMnu Vladmir Putin eveze ngoLwesibili ukuthi useqinisa amasotsha akhe asempini yeUkraine ngokuthumela amanye njalo azinkulungwane ezingamakhulu amathathu khonale kweleUkraine.
UPutin uthe njalo uzasebenzisa yiloba yiziphi izikhali, okugoqela eze-nuclear, alubana amanye amazwe ethe angenela. UBiden ukusolile kakhulu lokhu njalo wathembisa ukuthi eleMelika lizaqhubeka lisekela eleUkraine kulimpi.
Uthe umhlaba ubhekane lenkinga ezinengi ezigoqela indlala ehlasele edaweni ezinengi, ikakhulu emhlubulweni weHorn of Africa, ukudula kwezinto emhlabeni jikelele, umkhuhlane weCovid-19 kanye lokuguquka komkhathi, i-climate Change.
UMongameli Biden uthe amazwe omhlaba kumele ebambane emizameni yokuqeda lezindubo.