Uhulumende usephawule okusemthethweni ihlandla lakuqala lohlelo lokuvikela abantwana kumkhuhlane wePolio, oluqala kusasa.
Phansi kohlelo lolu olugqitshwa mhlaka 30 Mfumfu, kuzavikelwa kugciwane lePolio abantwana abaleminyaka esuka emihlanu kusiyaphansi.
Uhlangothi lwezempilakahle luthi kusiyaphela uhlelo lolu sokwenziwe lehlandla lesibili, bakhangelele ukuba bazafinyelela abantwana abayisilinganiso sokungamatshumi ayisitshiyagalolunye lanhlanu ekhulwini – 95 percent, kunani labantwana abedlula izigidi ezimbili lengxenye – 2,556 800 elizweni lonke jikelele. UDokotela John Mangwiro, ophethe uhlangothi lukahulumende olwezempilakahle, utshele intathelizindaba ukuba uhlelo lolu luqhutshwa emazweni atshiyeneyo ngemva kokuqhamula kwalumkhuhlane emazweni angomakhelwane, agoqela eleMozambique leMalawi. Uthi uyingozi umkhuhlane wepolio.
“Kumele simanyane sisebenzisane ngenjongo eyodwa, ukulondoloza eleZimbabwe kanye lesigaba ukuqeda lumkhuhlane we-polio ngokubona ukuthi abantwana bethu bonke bavikelekile. Singabambisana singamisa ukumemetheka kwawo.”
Lokhu kusekelwa nguDokotela Alex Gasasira, ophethe uhlangothi lwezempilakahle eZimbabwe kunhlanganiso yeWorld Health Organization.
“Ukungena kwalomkhuhlane we-Polio kwele Zimbabwe, kungaba lengozi kakhulu kulandela ukuvela kwawo kuzweni angomakhelwane. Kungakho amazwe amanengi esigabeni sakithi enzanzi lezwekazi leAfrica, aseqhuba imikhankaso efana lalowo ozoqala eZimbabwe kusasa.”
UDokotela Maphios Siamuchembu, umphathi wezibhedlela zonke koBulawayo, uthi kumele abazali behambele phezulu kuhlelo lolu.
“Umntwana nxa eselepolio, esingakwenza kuphela yikwenza ukuthi impilo yakhe ibe ngcono, engazwi ubuhlungu kakhulu. So, kungcono ukuthi sithi abantwana bethu behlatshwe, ukuvikela ipolio.”
Ele-Zimbabwe libikwa lacina ukuba lesehlakalo se-polio ngomnyaka ka1989. Kunsukwana ezisanda kwedlula, kuqhamuke igciwane lepolio kwele Malawi lakwele Mozambique.
