BULAWAYO - Ugatsha lukahulumende olubona ngezamanani olweZimbabwe National Statistics Agency (ZimStat), lona oluhlezi luchothozwa ngabanye besithi alwethuli amanani aqondileyo ngezomnotho lezinye inhlelo zikahulumende, luthi solusebenzisa imitshina yakulezinsuku ukuthapha ulwazi, okuzakwenza luqhube kuhle umsebenzi walo.
Umqondisi weZimstat uNkosikazi Farai Ndlovu wethule amazwi la ngoLwesihlanu emkhosini wokunanza usuku lweAfrican Statistics Day oqhutshelwe koBulawayo.
I-ZimStat ihlezi isolwa ngabanengi abathi amanani ewethulayo afana laweCensus kumbe ukubalwa kwabantu kanye lawokuwa komnotho, i-inflation, kavezi iqiniso ngoba lolugatsha luphoqwa nguhulumende ukukhuluma lokho akufunayo.
Abanengi bayisole kakhulu phezu kwempumela yeCensus eqhutshwe lonyaka eveze ukuthi izigaba zeMaNdebeleni zilabantu abalutshwana kakhulu.
Kodwa uMaNdlovu uthi ugatsha lwakhe lusebenza lenhlanganiso zamazwe omhlaba ekuqhubeni umsebenzi wabo; ngakho, uthe abazibumbeli impumela yemizebemzi yabo.
Ekhuluma emkhosini ofanayo umabhalane wedolobho lakoBulawayo uMnu Peter Nyoni uthe ilanga leAfrican Statistics Day liqakathekile ngoba isizwe esingela lwazi ngokuhleleka kwaso silahlekile.
Umphathintambo obona ngezemali, uMnu Mthuli Ncube, yena obemele abekhona emkhosini lo, uthumele umbiko obalwe ngesinye isiphathamandla sikahulumende.
Kumbiko lo uNcube uthe ukuqoqwa kwamanani ngemfanelo kuqakathekile kunhlelo zokuthuthukisa inhlalakahle kazulu.
Ilanga leAfrica Statistics Day linanzwe ngaphansi kwendikimba ethi “Strengthening data systems by modernizing the production and use of agricultural statistics informing policies with a view to improving resilience in agriculture, nutrition and food security in Africa.”
